Данец пронашол викиншко злато старо 1.000 години додека се шетал во шума
Еден човек од Данска се шетал по шумски пат во близина на градот Ролд, на полуостровот Химерланд, кога забележал нешто необично во земјата. Два метални предмети блескале на површината на земјата. Кога се приближил и ја раскопал почвата со рацете, извадил две тешки златни белегзии од викиншката ера. Интересно е што не користел детектор за метал, туку ги пронашол сосема случајно.
Препорачано
Иако можел да ги задржи за себе, решил да ги однесе во Музејот на Северен Јитланд за експерти да ја проценат нивната вредност според данскиот систем, кој се користи за проценка на историски важни археолошки наоди. Штом кустосите ги виделе масивните златни белегзии, им било јасно дека станува збор за исклучително ретко богатство од викиншкиот период, пишува „Археолоџи њуз“.
Истиот ден, археолозите отишле на теренот каде што бил пронајден првиот дел од богатството. Откако почнале да го пребаруваат подрачјето со детектори за метал, пронашле трета белегзија речиси на истото место. Сепак, вистинското изненадување се случило неколку метри подоцна, кога уредите повторно реагирале. Потоа од земјата биле извлечени уште три златни белегзии, внимателно наредени една врз друга.
Сите шест белегзии се целосно зачувани. Нивната вкупна тежина е 1,7 килограми чисто злато. Оваа колекција, која беше наречена Ролдско богатство, сега се смета за трето најголемо златно викиншко богатство пронајдено во Данска. Големи откритија се евидентирани само во случајот со прстенот Тисо од 1977 година и богатството Фестед пронајдено во близина на Рибе во 2016 година.
– Ова е навистина уникатно откритие. Никогаш не сме виделе нешто слично во нашиот музеј – рекол Торбен Сарау, археолог и раководител на секторот за културно наследство во Музеите на Северен Јитланд.
Површината на нараквиците е украсена со комбинација од извиткано злато и мазни детали, што укажува на исклучително софистицирано златарство. Експертите го датирале богатството помеѓу 900 и 1000 година од н.е., т.е. периодот кога данската област почнала да се обединува под власта на кралот Харалд Синиот Заб.
Во тоа време, златните белегзии не биле само декорација, туку и симбол на политичка моќ, богатство и висок општествен статус. Музејските експерти веруваат дека пронајдените предмети можеби биле поврзани со раната данска монархија од 10 век.
