Досегашниот министер за надворешни работи на Србија, Ивица Дачиќ ќе биде нов претседател на српското Собрание, изјави шефот на државата Александар Вучиќ по седницата на Претседателството на Српската напредна странка (СНС).

– Мислам дека е важно како искусен политичар да раководи со сите, посебно да ги разбереме сите овие промени на српската политичка сцена, низ антиваксери, анти-коронери, од таму и така голема омраза и кон мигрантите. Ќе има многу работа за него“, рече Вучиќ.

Тој најави дека првиот собраниски одбор ќе биде формиран во четврток, истакнувајќи дека „мисли оти ќе мора да се донесат многу важни закони на патот кон Европската Унија“. Вуќиќ додаде дека во петок, пратеничката група би поднела закон за новите министерства кои „ќе бидат две-три“.

– Експозето ќе биде во среда по што би била изгласана и новата влада, најави претседателот на Србија и на СНС, додавајќи дека останале уште некои дилеми за влада, односно за министрите, и „за ден-два се ќе биде завршено“.

Во новата српска влада и СПАС на Александар Шапиќ

Вучиќ потенцира дека коалициски партнер на СНС во владата, покрај СПС, ќе биде и Српскиот патриотски сојуз (СПАС) на Александар Шапиќ. Посочи дека лидерот на СПАС, Шапиќ на денешниот состанок инсистирал на разговори за иднината на Србија, како и дека сакал да „учествува во српската политика“.

– Шапиќ немаше никакви барања на денешниот состанок, ниту за министерства, ниту за министри“, истакна Вучиќ.