Денеска во општинската сала во Прилеп беше конституиран новиот 27-член општински Совет, кој ќе работи во следните четири години и ќе донесува одлуки значајни за функционирањето на општината и за подобрување на животот на прилепчани. Во него има 17 советници од ВМРО ДПМНЕ, шест од СДСМ со коалицијата, тројца се од Левица и еден советник е од ЗНАМ.

По конституирањето на советот беше избран и претеседателот на Советот на Општина Прилеп. Со мнозинство гласови за претседател е избрана доктор Билјана Кржеска од ВМРО ДПМНЕ, специјалист гинеколог, која, заблагодарувајќи се за довербата што ѝ ја дадоа советниците, рече дека заедно „ќе ги вгради заложбите за Прилеп – посилен, пофункционален, похуман, модерен“.

– Голема е честа што ја добив да бидам претседател на Советот на Општина Прилеп. На сите нас ни е дадена шансата да оставиме свој белег и да испишеме уште една страна во постоењето на Општина Прилеп. Локалната власт е најуспешна кога им служи на граѓаните и на народот. А на граѓаните и на народот се служи кога ќе ја почитуваме транспарентноста, кога ќе слушаме со почит и кога ќе делуваме со чесност. Лично верувам дека целиот Совет има потенцијал и капацитет да го направи Прилеп град со кој сите ќе се гордееме. Во различноста е силата!, рече Кржеска.