Градскиот автобуски превоз во Тетово ќе чини 20 денари, а ќе има пет категории на месечни и годишни билети, најави претседателот на Советот на општината, Беким Мемети. За цените и другите параметри на превозот треба да се одлучи на седницата закажана за 28 јануари, откако на 17 јануари општината ги промовираше петте набавени автобуси.
– Билет за едно возење ќе чини 20 денари. Во категорија А, билетот за сите граѓани месечно ќе чини 900 денари, а годишно 9.000 денари. Категорија Б е за студенти (350 месечно/3.500 годишно), категорија Ц е за пензионери и луѓе над 62 години (350/3.500ден.) Категорија Д е за вработени во општина Тетово (450/4.500) и категорија Е лица со над 80 отсто попреченост за кои ќе има бесплатен превоз, пишува Мемети на профилот на „Фејсбук”.
Директорот на јавното претријатие „Тетово транспорт” Фејсал Беадини информира дека ценовникот е пратен на усвојување до Советот на општина Тетово и се чека на негово одобрување согласно законските одредби.
Планирани се три рути за одвивање на јавниот транспорт низ градот. Првата рута е од автобуската станица на улица „Борис Кидрич” до Универзитетот на Југоисточна Европа. Втората рута исто од „Борис Кидрич”, преку „Иво Лола Рибар”, и повеќе други улици во северозападниот дел од градот и завршува на почетната станица.
Третата рута ќе почнува од улица „Борис Кидрич”, па преку булевар „Видое Смилевски – Бато”, ќе се минува низ сообраќајните во источниот и јужниот дел од градот.
За набавка на автобусите општината зеде кредит од Светска банка во висина од 1,2 милиони евра. До 90-тите години, во Тетово јавен превоз извршуваше сообраќајното претријатие „Полет” за кое беше започната стечајна постапка.
