Царовска: Земјава првпат во својата историја го доставува „Доброволниот национален преглед” до ООН
-Доброволниот национален преглед дава слика или проценка за тоа на кој начин се усогласени развојната Агенда 2030 на ООН, со европската агенда и нашите стратешки приоритети, вели Царовска.
Делегација од Република Северна Македонија, која ја предводеше вицепремиерката задолжена за економски прашања и координација со економските ресори, Мила Царовска, преку видео конференциска врска учествуваше на политичкиот форум на високо ниво, организиран од Економско социјалниот совет на ООН (United Nations economic and Social Council – ECOSOC).
Вицепремиерката Царовска истакна дека е горда што земјава првпат во својата историја го доставува „Доброволниот национален преглед” до Организацијата на Обединетите Нации.
-Доброволниот национален преглед дава слика или проценка за тоа на кој начин се усогласени развојната Агенда 2030 на ООН, со европската агенда и нашите стратешки приоритети. Утврдивме дека 83 отсто од она што значи национално законодавство, стратешки документи, акциони планови се усогласени со глобалните цели за развој и тоа укажува дека ние и како Влада, но, и како држава сме на правата патека да ги оствариме целите коишто се во целиот свет зацртани како потребни, се со цел да се постигне развој на општествата и на државите, истакнува Царовска.
На конференцијата, покрај Цавровска учествуваа и претседателката на МАСИТ, Анета Антова Пешева, како претставник на бизнис заедницата, директорката на тинк-тенк организацијата „Фајнанс Тинк”, Благица Петрески, како претставник на граѓанското општество, и претставничката на младинската мрежа „Y-PEER”, Кристина Ангeлевска, како претставник на младите.
На овој форум, кој го водеше претседателката на ECOSOC, Н.Е. Мона Џул, беше извршена презентација на првиот „Доброволен национален преглед” на Република Северна Македонија, a по обраќањата на официјалната делегација кусо обраќање имаше и резидентната координаторка на ОН агенциите во Северна Македонија, Росана Дуџак.