Црвена Звезда го засили својот тим со ново НБА засилување — 25-годишниот плејмејкер Џеред Батлер. Овој талентиран американски кошаркар, кој има искуство од НБА, пристигнува во Белград по мината сезона во Вашингтон Визардс и Филаделфија 76ерс, каде што одигра вкупно 60 натпревари.

Батлер, кој минатата сезона настапуваше и во Џи-лигата, беше одличен во претсезонскиот натпревар против ЛА Лејкерс, постигнувајќи 35 поени за Феникс Санс. Сепак, не доби понуда за продолжување на кариерата во НБА и реши да го продолжи својот пат во Европа, каде првата дестинација е Црвена Звезда.

Според неофицијални информации, Батлер и Црвена Звезда потпишале договор на една ипол година вреден 3,8 милиони евра, со опција за раскинување на соработката ако Батлер добие понуда за враќање во НБА.

Како играч кој беше избран на драфтот во 2021 од Њу Орлеанс Пеликанс, но никогаш не настапи за нив, Батлер потоа имаше кратки престои во Јута Џез, Оклахома Сити Тандер, Вашингтон и Филаделфија, а дел од кариерата помина и во Џи-лигата, каде што стекна дополнителна минутажа и искуство.

Со неговото пристигнување, Црвена Звезда добива исклучително талентиран плејмејкер кој може да биде клучен за тимот во предизвиците што претстојат, особено во европските натпревари.

Преземено од: Спорт.ком