Во понеделник ќе се одржи првиот буџетски форум во општина Центар преку кој граѓаните можат директно да влијаат врз креирањето на општинскиот буџет за наредната година, предлагajќи проекти и идеи кои се приоритетни за нив.

Градоначалникот Горан Герасимовски ги повика сите жители на општината да учествуваат на форум за 2025 година, кој ќе се одржи во основното училиште „Јохан Хајнрих Песталоци“ со почеток во 19 часот.

Транспарентноста и отчетноста се клучни принципи на нашето работење. Секој предлог на нашите жители има вредност, а учеството на форумот ќе ни овозможи заеднички да донесеме решенија што ќе ги задоволат реалните потреби на општината. Ова е шанса граѓаните да го креираат својот начин на живеење во Центар – изјави Герасимовски.

На форумот општинските сектори ќе ги презентираат и капиталните проекти кои се планирани за следната година, но и резултатите од проектите реализирани во изминатите три години. Преку овие дискусии ќе им се овозможи на граѓаните да имаат увид во напредокот и да дадат свои предлози за понатамошни подобрувања.

Очекуваме конструктивни предлози и идеи, бидејќи сите заедно сме одговорни за квалитетот на животот во нашата општина – додава Герасимовски.