Од утрово сите вработени од комуналната служба во ЈП „Паркинзи на Општина Центар“, со целата механизација со која располага претпријатието, се на улиците во обид да го исчистат ѓубрето од преполните контејнери, кои поради протестот на дел од вработените во „Комунална хигиена“, цел викенд не беа испразнети. Од Општината информираа дека покрај останатата механизација, располагаат и со голем камион за кревање на контејнери, а на терен е пуштена и цистерна со која се мијат контејнерите и просторот околу нив, за да се отстрани и непријатната смрдеа.

Градоначалникот Горан Герасимовски вели дека во сите населби има преполни контејнери и дека поплаки од граѓаните стигнуваат од секаде.

Целата механизација е на терен и очекувам денеска да се исчисти голем дел од општината. Оваа ситуација во која се наоѓаме сите општини не смее да се повтори затоа денеска со сите градоначалници ќе разговараме за одземање на ингеренциите на ЈП „Комунална хигиена”. Воедно им се заблагодарувам и на сите вработени кои со зголемени капацитети се вклучија во акцијата со цел побрзо чистење на општината – изјави Герасимовски.