Бугарија ќе бара со нота да им се обезбеди пристап на Бугарите на 4 февруари, најави Милков
Бугарија ќе побара со нота да им се обезбеди пристап на Бугарите кои што ќе патуваат во Македонија за да се поклонат пред споменикот на Гоце Делчев на 4 февруари, најави бугарскиот министер за надворешни работи Николај Милков на отчетот за сработеното во МНР за време на техничката влада.
На настанот, како што кажа, ќе присуствуваат и претставници на бугарската амбасада во Скопје.
– Клучно е да се гарантира безбедност на Бугарите таму. Обезбедувањето непречено оддавање почит на 4 февруари е дел од тоа. Ние сакаме да постигнеме деескалација и не бегаме од таков дијалог. Нашиот премиер ќе има телефонски разговор со македонскиот премиер Ковачевски, а еден од главните елементи ќе биде осигурување на безбедноста на бугарските граѓани таму воопшто, како и за тоа што ќе се случи на 4 февруари. Ние се залагаме за таква деескалација, но таа не треба да не враќа на ситуацијата пред една недела бидејќи тоа би било бетонирање на на репресијата, изјавил Милков, а пренесува БНТ.
Според него, ако Северна Македонија го попречи пристапот на бугарските граѓани, тоа би било без преседан.
– Ако тоа се случи, тоа ќе биде без преседан. Немам информации дека две земји членки ги прогласиле своите граѓани за персона нон грата. Ова ќе биде без преседан и ќе бара одговор без преседан, вели тој.
Милков уште додава дека Бугарија ќе бара од македонските власти потврда дека локалните институции ќе си ги вршат функциите.
Тој вели и дека Бугарите и луѓето со бугарска самоопределба немале доверба во македонските институции, а поплаките што ги поднесуваат не се разгледувале или ако се разгледувале добивале негативен резултат.
– При ваков притисок, Бугарите во Северна Македонија немаат многу опции, или треба да ја прекинат својата дејност или да се вратат во Бугарија. Тоа треба да е дел од нашиот дијалог таму за да може да се излезе од тој маѓепсан круг, тие се жалат, а бумерангот им се враќа. Бугарски клуб е нападнат, а членовите на тој клуб се повикани во полиција на распит. Тоа е основниот проблем, за какви и механизми да се залагаме, ако институциите не си ја вршат работата, нема да има резултати, додава Милков.