Финскиот возач во Формула 1, Валтери Ботас, откри дека неговиот изнајмен „Кадилак“, кој му бил обезбеден од неговиот тим бил украден од пред апартманот во кој престојувал за време на викендот на Големата награда на Мајами.

Финецот изјави дека престојувал на убаво место со ниска стапка на криминал, раскажа Ботас и дека претходно престојувал во Мајами и не е соочувал со проблеми.

„Се вративме во петокот и како и обично, автомобилот го оставивме на влезот, брзо вечеравме и рано си легнавме. Клучевите беа во апартманот, а возилото беше заклучено. Се разбудив во саботата наутро и бев под туш околу 15 минути пред да тргнеме кон патеката. Тогаш ми се јави Пол Харис, мојот личен асистент, кој беше сместен во апартманот до мене. Му реков: ‘Ало, зошто ми ѕвониш кога си веднаш до мене?’, а тој ми одговори: ‘Се прашував каде си заминал, автомобилот го нема’. Не можев да поверувам. Излегов надвор, а возилото го немаше. Клучевите сè уште стоеја на масата. Ни го украдоа автомобилот. Можев дури и да задоцнам на патеката затоа што моравме брзо да најдеме друг превоз, но за среќа ни испратија уште еден кој нè однесе. Потоа се сетив дека мојата пропусница остана во автомобилот. Сепак, најдов решение. ФБИ исто така се вклучи во истрагата“, раскажа Ботас.

Украдениот автомобил инаку бил пронајден следниот ден, напуштен во област позната по висока стапка на криминал.