Српскиот актер и режисер Драган Бјелогрлиќ рече дека денес Србија е најтажната земја во Европа, а можеби и во светот, соочувајќи се со тежок период, објави Н1.

„Кој знае што нè чека, а ако се случи таа победа на која се надеваме, чекаме скршено општество, празни каси…“, оцени Бјелогрлиќ, повикувајќи ги „сите членови на општеството да се обидат да се обединат на еден фронт и сите да помогнат во тој социјален бунт предводен од студентите, без разлика дали тоа ќе биде еден студентски список, или неколку колони од истата страна, би сакал еден, но ако не е можно – ајде да направиме некаков општествен договор“.

Тој додаде дека постои намера да се прикрие одговорноста за 16-те смртни случаи при падот на настрешницата на Железничката станица во Нови Сад, како што се случило многу пати претходно.

„Истите тие луѓе одговорни за сè што ни се случува, пијат скапи вина вредни неколку десетици илјади евра… додека нивната младост крвави во Србија, обидувајќи се да се борат за трошка надеж на својата иднина“, истакна тој.

Тој додава дека нема сомнение дека поголемиот дел од Србија се разбудил и е подготвен да се бори за слобода, за нова Србија.

„Потенцијалот е огромен, но она за што сите сме свесни е дека политичката борба што нè очекува, односно изборите, не знаеме кога ќе бидат, не знаеме дали сме во можност да го принудиме Вучиќ да ги распише, бидејќи за секој ден што го поминуваме во оваа држава, ќе ни требаат уште десет за да се опоравиме“.

Тој нагласува дека треба да се работи на политичка артикулација и оценува дека студентскиот список е непознат, изборите не се објавени, „а сакаме да се подготвиме за нив“.

Бјелогрлиќ, кој е и еден од основачите на ПроГлас, вели дека имаат идеја да се борат за гласот на дијаспората, во која, како што додава, според проценките, има помеѓу 150 и 200 илјади гласови, „ние сме подготвени за тоа, но не сме доволни, но не можеме да најдеме сојузници“.

На прашањето што е пречка за единство, тој вели дека има многу пречки.