Скандалот со заразено бебешко млеко предизвика голема загриженост кај родители во Австрија и во светот. Производите на повеќе големи компании беа повлечени од пазарот поради присуство на бактеријален токсин наречен церулид кој предизвикува повраќање и болки во стомакот, а во високи концентрации може да предизвика оштетување на органите. Во Австрија властите пријавиле четири сомнителни случаи на деца кои покажале симптоми на интоксикација од токсините и поднеле кривична пријава.

Многу семејства биле збунети кога нивните бебиња почнале ноќе да покажуваат силни стомачни болки, додека преку ден делувале здраво. Детските доктори не пронашле причина за состојбата, а родителите започнале да се сомневаат дека виновник е бебешкото млеко кое го користеле неколку недели. Слични стравови се појавија кај голем број родители низ целата земја. Од почетокот на годината се открива меѓународен скандал со бебешко млеко заразено со токсин, кој допрел и до австрискиот пазар.

Повлекувања од пазарот и сомнителни случаи

Компаниите „Нестле“ и „Данонe“ повлекоа одредени серии на производи откако беше откриен церулид. Изворот на контаминацијата се наоѓа во кинескиот град Вухан, од каде заразени состојки биле доставени на неколку големи производители на бебешка храна. Четирите австриски случаи се на деца на возраст од нула до единаесет месеци и се случиле помеѓу дваесет и шести јануари и шести февруари. Кај едно дете беше потврдено присуството на токсин во консумираниот производ, кај две други деца се потврдило дека консумирале повлечени серии, додека кај четвртото дете се користела серија што не била повлечена. Едно дете морало да биде хоспитализирано, додека останатите три закрепнале.
Родителите се загрижени и разочарани. Многумина користеле производи од сериите што биле повлечени и од кои нивните бебиња имале болки и повраќање. По премин на безбедни алтернативи, симптомите исчезнале, што ги прави родителите сигурни дека постои поврзаност. Мнозина исто така се жалат на доцното информирање и на нејасната комуникација од страна на производителите и властите. Досега околу двесте пријави се поднесени до организацијата за заштита на потрошувачи „Фудвоч“ Австрија, со извештаи за долготрајни симптоми кај бебињата.

Тивок повик за повлекување и критики на комуникацијата

Скандалот започна со интерна предупредувачка информација во ноември кај „Нестле“ во Холандија. Првите повлекувања се случија во Холандија и Франција, а Австрија започна со контроли. На дваесет и трети декември, Виенскиот пазарен инспекторат откри токсин во производ кој се продавал во Австрија. Компанијата веднаш започнала тивко повлекување, отстранувајќи ги производите од продавниците за време на празниците без јавна објава. Токсинската контаминација била оценета како несигурна, но не здравствено штетна, што ѝ оставило на компанијата избор дали повлекувањето ќе биде тивко или јавно.

На петти јануари, по усогласување со властите, „Нестле“ започнал јавен повик за повлекување на одредени серии на производите „беба“ и „алфамино“. Во меѓувреме, Данонe на триесетти јануари пронашол церулид во производите „аптамил“, оценет како штетен по здравјето, што барало итен јавен повик за повлекување. Четири серии веднаш биле повлечени, а пазарниот инспекторат поднел кривична пријава според Законот за безбедност на храна. На петти февруари Данонe повлекол уште десетици серии на „аптамил“ и „милумил“, а властите вовеле привремена забрана за продажба на сите производи на компанијата до проверка на безбедните серии.

И двајцата производители соопштија дека веќе не користат суровини од заразени кинески добавувачи и дека сите производи во продажба се безбедни. Европската агенција за безбедност на храна оценила дека ризикот од нови случаи е низок, но предупредила дека можат да се појават нови проблеми доколку повлечените производи не се вратат.

Комуникацијата co компаниите, особено со Данонe, е критикувана. „Фудвоч Австрија“ веќе добил информации за повлекување на производи пред официјалниот јавен повик. Компанијата ги негирала информациите и побарала нивно отстранување од веб- страницата на „Фудвоч“. Родителите реагираат со загриженост и незадоволство, истакнувајќи дека одлуката дали јавноста ќе биде информирана или повлекувањето ќе биде тивко не смее да биде во рацете на компаниите, особено кога станува збор за бебиња.

Многу родители, како мајката на Миа, која уште од роденденот користела бебешка храна поради недоволна тежина, го искусиле проблемот со повраќање и болки. Иако на почетокот производите се покажале како безбедни, јавниот повик за повлекување бил извршен само неколку часа по дописот до клиентите, оставајќи чувство на вина и незадоволство кај родителите. Во моментов адвокат се занимава со случајот на Миа, а родителите се решени да го следат процесот до крај.