Уште еден доказ дека Македонија поседува боречки бисери кои што треба постепено да се вреднуваат, почитуваат и секако се вложува во нив. Доста таленти излегуваат од нашата земја и уште од млада возраст го покажуваат сиот свој потенцијал веќе и на меѓународната сцена.

Еден од нив е и младиот македонски борач Теодор Георгиев кој блесна на Балканското првенство во Ксанти (Грција) освојувајќи го златниот медал во категоријатата до 110 килограми. А потоа на Медитеранското првенство беше второпласиран, како и втор  во екипен пласман. Инаку Македонија има уште еден балкански првак, Марија Спирковска (-43 кг.) во женска конкуренција.

Кога и како се заинтересиравте да бидете дел од борењето, колку време тренирате?

– Уште од мал мојот вујко Бобан Данов ми е идол и одлучив да тргнам по неговите стапки. Тренирам пет години.

Како изгледа еден ваш обичен ден, како се мотивирате, што е за вас најинтересно на тренинзите?

– Мојот обичен ден се состои од два тренинзи ако не сум на училиште. Едниот е наутро потоа одморам и имам уште еден тренинг поручек. Секогаш сум мотивиран затоа што сакам да покажам што можам и да ги постигнам моите цели. Мојот најинтересен дел од тренингот е кога правиме слободно увежбување на зафатите.

Кои се вашите најголеми успеси, резултати на домашната и меѓународната сцена?

– На домашната сцена имам освојувано многу државни и изборни првенства. На меѓународната сцена најголем резултат ми е златниот медал на Балканското првенство во Ксанти.

Кои се вашите следни активности, нови настапи во понатамошниот период?

– Следниот настап ми е на Македонски бисер во Струмица на 19 ноември.

Дали имате неостварени желби кои би сакале да ги остварите во иднина, со цел за ваши уште поголеми успеси?

– Моја најголема желба е да се квалификувам за Олимписките игри.

Што е потребно кај еден борач, воопшто спортисти за да стигне до врвот, да освои златен медал или биде дел од победничкиот подиум?

– Потребно е да биде секогаш мотивиран за макотрпна работа, да има трпение, да верува во себе дека може да успее.