Директорот на Агенцијата за филм Сашко Мицевски учествуваше на „Балкан филм маркет“, значаен регионален настан кој претставува платформа за развој, продукција и дистрибуција на филмски проекти од Балканот.

Настанот, што се одржа од 16 до 20 декември во Тирана, Албанија, ги обединува филмските професионалци, институции и филмски центри од регионот и Европа, со цел зајакнување на меѓусебната соработка, размена на искуства и унапредување на регионалната филмска индустрија.

Во рамки на програмата, заедно со претставници на националните филмски институции од Албанија, Косово и Црна Гора, Мицевски учествуваше во презентација на актуелниот регионален филмски развој, предизвиците и перспективите на филмската сцена во Западен Балкан.

Во рамки на сесијата „Балкан пич“ (Balkan Pitch) на маркетот македонскиот филм „Балада за лонецот и капакот“, во режија на Вардан Тозија и продукција на Ивана Шекуткоска, го доби признанието „Best pitch“, како и финансиска поддршка за копродукција од Албанскиот национален кинематографски центар. Проектот е поддржан од Агенцијата за филм на првиот рок од конкурсот за 2025 година и моментално се наоѓа во фаза на претпродукција.

На настанот се претстави и режисерката Ана Опачиќ, која го презентираше својот иден филмски проект „Трета смена“, исто така поддржан од Агенцијата за филм.