„Мета“ ќе ги блокира тинејџерите и децата под 16 години во Австралија од нејзините платформи на социјалните медиуми уште од 4 декември, шест дена пред да стапи во сила законот со кој се забранува пристап до социјалните медиуми за деца под таа возраст.

„Почнувајќи од денес, „Мета“ ги информира австралиските корисници за кои верува дека се на возраст од 13 до 15 години дека ќе го изгубат пристапот до „Инстаграм“ , „Тремс“ и „Фејсбук “, се вели во соопштението на американската технолошка компанија, пренесува Еј-би-си Австралија.

„Мета ќе започне со блокирање на креирањето нови сметки од страна на лица под 16 години и спречување на пристап до постојните сметки почнувајќи од 4 декември, а планира да ги избрише сите сметки за кои се знае дека им припаѓаат на деца под 16 години до 10 декември“, се вели во соопштението.

Компанијата додаде дека бара од младите корисници на нејзините платформи да ги ажурираат своите контакт информации за да можат да бидат известени кога повторно ќе можат да добијат сметка.

Исто така, ги информираше дека можат да ги преземаат и зачувуваат своите објави, видеа и пораки пред да им се затворат сметките, иако увери дека ќе можат да пристапат до своите сметки „точно онака како што ги оставиле“ откако ќе наполнат 16 години.

Според владини бројки, во Австралија има околу 350.000 корисници на Инстаграм и 150.000 корисници на Фејсбук на возраст од 13 до 15 години.

Од 10 декември, платформите на социјалните медиуми во Австралија се обврзани да ги блокираат корисниците кои се под 16 години. Непочитувањето на ова може да резултира со казни од речиси 28 милиони евра (49,5 милиони австралиски долари).

„Ја делиме целта на австралиската влада за создавање безбедни и соодветни на возраста онлајн искуства, но исклучувањето на тинејџерите од нивните пријатели и заедници не е решение“, рече Мета.

Компанијата би сакала закон со кој ќе се бара децата под 16 години да имаат родителска согласност за да отворат сметка на социјалните медиуми.

Австралискиот закон, еден од најстрогите во светот на хартија, внимателно го следат и други земји кои исто така се обидуваат да постават рамки за користење на социјалните медиуми од страна на децата.

Сепак, многу експерти веруваат дека законот е главно симболичен поради тешкотиите во проверката на возраста на корисниците на интернет.