Австралија се согласи да им издаде визи на пет членки на женската фудбалска репрезентација на Иран за да останат во земјата. Овој потег доаѓа неколку часа откако американскиот претседател Доналд Трамп ги повика австралиските власти да не ги враќаат во Техеран поради безбедносни причини, откако одбија да ја пеат националната химна пред натпреварот од Азискиот куп, пренесува Ал Џезира.

Министерот за внатрешни работи Тони Бурк им рече на новинарите дека и остатокот од тимот е добредојден да остане во Австралија.

Last night I was able to tell five women from the Iranian Women’s Soccer team that they are welcome to stay in Australia, to be safe and have a home here. pic.twitter.com/2JQp9q9Z8W

— Tony Burke (@Tony_Burke) March 9, 2026

„Тие можат да останат во Австралија, тука се безбедни и треба да се чувствуваат како дома“, им рече тој на новинарите.

26-те члена на иранската делегација пристигнаа во земјата неколку дена пред почетокот на американско-израелските напади, кои, меѓу другото, предизвикаа смрт на поранешниот врховен лидер, ајатолахот Али Хамнеи.

Доналд Трамп вчера на својата мрежа Трут сошал објави дека Австралија ќе им помогне на играчите. „Тукушто разговарав со премиерот на Австралија, Ентони Албанезе“, напиша американскиот претседател, кој претходно побара од Канбера да направи нешто за спортистите.

„Австралијците веќе се грижат за петмина од нив, а останатите ќе следат. Сепак, некои сметаат дека мора да се вратат во Иран затоа што се плашат за безбедноста на своите семејства“, додаде тој, нагласувајќи дека австралискиот лидер „врши многу добра работа во оваа многу деликатна ситуација“.

Поддршка од Реза Пахлави

Реза Пахлави, син на последниот шах на Иран, веќе ја повика Австралија да ја обезбеди безбедноста на играчите.

„Членките на иранската женска репрезентација се под силен притисок и закани од Исламската Република“, напиша синот на шахот на „Икс“. „Тие се соочуваат со сериозни последици ако се вратат во Иран. Ја повикувам австралиската влада да ја обезбеди нивната безбедност и да им ја обезбеди целата потребна поддршка“, додаде тој.

Други личности, исто така, ја изразија својата поддршка за играчите, вклучувајќи ја и авторката Џеј Кеј Роулинг, која повика на социјалните медиуми да ги „заштитат овие млади жени“.

Иранските играчи молчеа додека се свиреше иранската химна пред нивниот прв натпревар на Азискиот куп против Јужна Кореја, два дена по почетокот на војната меѓу САД и Израел на 28 февруари. Тие ја пееја нормално во последователните натпревари.

Нивниот став беше протолкуван како чин на отпор, а водител на државната телевизија ги нарече играчите „предавници во време на војна“, што претставува „краен срам“.

„Спасете ги нашите девојки“

Толпа се собра пред стадионот „Голд Коуст“, каде што тимот го одигра својот последен натпревар овој викенд, скандирајќи „промена на режимот во Иран“, „пуштете ги“ и „спасете ги нашите девојки“.

Вчера новинар на АФП ги виде играчите како разговараат по телефон од балконот на нивниот хотел.

Според Заки Хајдари, активист на Амнести Интернешнл, играчите ризикуваа прогон доколку се вратат во својата татковина. „Некои членови на тимот веројатно веќе виделе како нивните семејства се загрозени“, изјави таа за АФП.

Иранките го имаа своето деби на Азискиот куп во 2022 година во Индија и станаа национални херои во земја каде што правата на жените се строго ограничени.