Атина му испрати демарш на Киев за поморскиот дрон кај Лефкада
Атина поднесе официјален протест до Киев против активностите на залутаниот поморски дрон што беше забележан на 7 мај од рибари во Лефкада, информираше денеска портпаролката на Министерството за надворешни работи, Лана Зочиу, за време на редовниот брифинг на дипломатските новинари, пренесува „Катимерини“.
Препорачано
Во демаршот се наведува дека беспилотниот брод пронајден во грчките територијални води сериозно го загрозил морскиот сообраќај и можел да предизвика загуби на невини цивили. Можел да предизвика и непроценлива еколошка штета.
„Со префрлањето на воените операции во Медитеранот, на голема оддалеченост од вистинскиот фронт на војната, нашата национална безбедност е во прашање, а нашата национална економија претрпува одлучувачки удар“. Правото на Украина на самоодбрана не може да ги оправда ваквите дејствија. Грција го изразува своето силно противење на нелегалното присуство на вооружениот беспилотен површински брод во грчките територијални води и ја повикува Украина да се воздржи од слични дејствија во иднина и од неоправданото префрлање на воените операции во Медитеранот“ се наведува во демаршот.
Како што пред неколку дена објави „Катимерини“, грчкиот шеф на дипломатијата Јоргос Герапетритис ја информирал високата претставничка на ЕУ за надворешни работи и безбедносна политика и потпретседателка на Комисијата, Каја Калас, за наодите од заклучокот на HNDGS, кој без сомнение покажува дека дронот дејствувал во име на Киев и е изграден и припаѓа на Украина. Герапетритис го информирал и својот украински колега, Андриј Симбиха, кој бил поканет да учествува на неформалниот Совет на министрите за надворешни работи на ЕУ (Гимних) во Лимасол, во рамките на кипарското претседателство.
Поморскиот дрон беше пронајден со вклучени мотори и наполнет со експлозиви, според информациите, со тежина од околу 70 килограми и рачно напишани белешки.
Откако била исклучена можноста за провокација и била извршена темелна инспекција од страна на експерти од Генералштабот во Скарамагас, било утврдено дека дронот бил дел од поширока мисија, каде што други слични системи би учествувале во погодување на бродови во руска сопственост.
ВИДЕО | Тревога во Грција: Украински поморски дрон пронајден во пештера кај Лефкада
