Лидерот на опозициската ВМРО-ДПМЕ Христијан Мицкоски ги повикува граѓаните на протести и на блокади со неосновани тврдења дека владата ја прифатила бугарската декларација, оценуваат аналитичарите. Според политикологот Петар Арсовски за да се обвини некој за национално предавство, предавството прво треба да биде направено.

– Обидот сега е каков било договор на Заев со Бугарија да биде прогласен за предавство. ВМРО-ДПМНЕ гледа дека нешто се раздвижува во таа насока, па засега тоа им е единствена политичка тактика. Мицкоски со ваквото однесување сака да ги зацврсне своите позиции пред гласачкото тело кое е понационалистички определено. Тој има причина да го држи ВМРО-ДПМНЕ во висока туража, затоа што ако партијата не се занимава со Бугарија и со Заев тогаш неминовно ќе се занимава со начинот на кој тој ја води. Не знам дали му е паметна оваа политика во овој момент и дали повторно не прави погрешна проценка како што беше во случајот со Преспанскиот договор. Насоката и политиките на Македонија се кон евроинтеграциите, а ако продожи со ваков деструктивен начин може да ги загуби позициите кај европските соработници, да го намали коалицискиот капацитет на партијата итн – вели Арсовски за „Слободен печат“. 

И  самиот Мицкоски завчера рече дека една од варијантите за разврска на проблемот со Бугарија е владиниот претставник Владо Бучковски во Софија да постигне усмен, наместо писмен договор, за кој потоа нема да мора да се носи владина одлука.