Ангела Василевска е новата претседателка на Универзитетското студентско собрание на Универзитетот „Св. Кирил и Методиј“. Таа беше избрана вчера, на втората седница на УСС УКИМ.

Василевска е студентка на Факултетот за информатички науки и компјутерско инженерство (ФИНКИ), трета година на студискиот смер Примена на информациски технологии.

Мандатот на новоизбраната претседателка, заедно со мандатот на новиот состав на делегати, официјално започнува на 1 ноември.

Василевска ќе го замени досегашниот претседател Александар Николовски, кој на чело на Собранието беше две години.

„Упатуваме искрени честитки до претседателката и до новиот состав, со желби за успешно реализирање на програмата која најавува бројни можности и активности во интерес на студентите на УКИМ“, се наведува во соопштението од Универзитетското студентско собрание.