Марија Андоновска, член на ИК на ВМРО-ДПМНЕ и директорка на Институтот на јавно здравје, вечерва на партиска трибина рече дека нејзината партија „наследила распаднати институции“ каде што „воопшто не се размислувало за услугите и грижа за граѓаните“. Таа додаде дека конкретно во Институтот, ниту една работа не била водена согласно законските прописи.

„Мораме да ги поставувавме темелите повторно, и нема да се откажеме и сме силно мотивирани да го направиме тоа. Најдовме распаднати институции, каде што воопшто не се размислувало ниту за услугите, ниту за институциите, а најмалку за граѓаните. Секој тргнувал само од личниот интерес, ниту една работа што ја затекнав во Институтот не беше водена согласно законски прописи, се беше спротивно на законот“, вели Андоновска.

Таа вели дека со преземањето на Институтот, затекнале опрема којашто била купена скапо, но не се употребувала повеќе години. Андоновска информираше дека опремата сега е ставена во употреба.

„Затекнавме опрема којашто е купена многу скапо и може да биде многу од корист на граѓаните, но е вон употреба повеќе години. Ја ставивме таа опрема во употреба и направивме се за таа да може да профункционира, повторно да можат граѓаните да се обратат во државните институции, наместо да идат само во приватните и да имаат дополнителни трошоци. Воведовме втора смена и сме единствената микробиолошка лабораторија којашто можат граѓаните да ја посетат и по работното време“, заклучува Андоновска.