Американските земјоделски власти бараат од одгледувачите на кокошки да им се дозволи да користат еден од најсуровите методи за убивање живина поради тековната појава на птичји грип.

Имено, повеќе од 49 милиони живина во САД или умреле или биле еутанизирани поради повеќекратни појави на птичји грип. Откако ќе се потврди појавата на оваа болест, сточарите мора да ги убијат и останатите здрави птици во околината, за што добиваат отштета од државата.

Во САД, методот на убивање на живина ВСД+ (исклучување на вентилација плус) се користи како последно средство во случај на критична ситуација бидејќи тоа е прилично сурова постапка во која голем број птици се изложени на висока температура најмалку три часа, по што умираат од топлотен удар. Живинарите мора да добијат посебна дозвола за користење на овој метод.

Активистите за правата и заштитата на животните ја опишаа техниката како „готвење живи животни“, а европските претставници како „веројатно многу болна“ и не треба да се користи, пишува Гардијан.

Сепак, Националната асоцијација на државните департмани за земјоделство (NASDA), која ги претставува земјоделските агенции на државно ниво низ САД, ја одобри мерката барајќи од американското Министерство за земјоделство (USDA) да размисли да го направи префериран метод.

Ова би значело дека одгледувачите на живина повеќе не мора да бараат одобрение за користење на овој метод или да покажат дека не можат да користат една од двете тековно преферирани мерки: труење со јаглерод диоксид или пена за гаснење пожар.

Активистите за правата на животните велат дека индустријата претпочита ВСД+ бидејќи е „најлесен и најевтин“ начин.

„Иако епидемијата на птичји грип е глобална, само САД целосно ја занемариле етиката и намерно топлински погодиле милиони животни“, рече Дена Џонс од Институтот за благосостојба на животните.