Американката Бризи Џонсон направи сензација на Светското првенство во алпско скијање во Залбах, Австрија, со победата во спустот во саботата, додека среброто го освои Австријката Мирјам Пучнер, а бронзата заврши во рацете на Чехинката Естер Ледеки.

Џонсон која стартуваше прва, славеше со време 1:41:29, Пучнер беше втора со 15 стотинки заостанување, а Ледеки 21 стотинка послабо.

За 29-годишната Џонсон, која беше суспендирана на 14 месеци во 2023 година поради прекршување на антидопинг правилата, ова е најдобриот резултат досега на големо натпреварување, светско првенство или Олимписки игри.

Досега нејзиниот најдобар резултат беше седмото место во спуст на Олимписките игри 2018 во Пјонгчанг (Јужна Кореја).

Таа имаше седум пласмани на подиумот на Светскиот куп, последен во 2021 година, но ниту една победа.