Тренерот на фудбалерите на Милан, Масимилијано Алегри, имаше искрена и отрезнувачка анализа по нивниот тежок пораз од 3:0 на домашен терен од Удинезе на „Сан Сиро“ во клучен период од сезоната кога се решава трката за титулата во Серија А. Тој призна дека местото на тимот во Лигата на шампионите следната сезона е веќе под сериозна закана и го бранеше правото на навивачите да го изразат своето незадоволство.

По последниот свиреж, трибините на „Сан Сиро“ избувнаа во бучни извици по најслабиот натпревар на „росонерите“ во сезоната.

– Тоа е дел од фудбалот. Кога победуваш, си добар, кога губиш, не си. Навистина целосно заслужуваат да нè исвиркуваат. Од друга страна, не станува збор за недостаток на напор од страна на момците, но мора да ги прифатиме критиките – рече Алегри за ДАЗН.

Алегри е убеден дека формацијата 4-3-3 не беше причина за поразот против Удинезе:

– Промената во системот нема никаква врска со тоа. Се наоѓаме во тежок момент – загубивме три од последните четири натпревари. Во втората половина од сезоната не успеавме да постигнеме гол во четири натпревари. Кога сте во Топ 4, ова е неприфатливо – додаде тренерот.

Тој го посочи недостатокот на смиреност во одбраната како клучен фактор во головите на Удинезе. Воедно, призна дека елиминацијата од трката за титулата влијаела психолошки на тимот.

– Бевме неорганизирани затоа што брзавме премногу. При вториот гол, ситуацијата беше „тројца против еден“. Треба да ја вратиме смиреноста и редот во играта. Фудбалот е прекрасен, но и суров. Овој пораз јасно ни кажува дека нашето место во Лигата на шампионите е во опасност. Мора да го искористиме овој пораз како можност да се претставиме подобро во следниот натпревар против Верона – се зборовите на Алегри.

Моментно на табелата во италијанскиот шампионат, Интер е водечки со 72 бодови, пред Наполи на Елиф Елмас со 65, а третопласиран е Милан со 63. Следуваат Јувентус на четвртата позиција со 60 бодови, петтопласиран е Комо со 58, еден повеќе од Рома на шестото место.

ВИДЕО | Удинезе го понижи Милан на „Сан Сиро“