Млада девојка остана без нога откако била нападната од ајкула во понеделникот додека пливала во Бразил, само еден ден по напад врз момче на блиска плажа, објави „Дејли мејл“.

Марсела Виториа де Лима Сантос, која има 19 години, пливала во Боа Виажем, во североисточен Бразил, кога ајкулата ѝ ја одгризала ногата.

Спасувачи со помош на туристи ја извлекле младата девојката од морето по нападот.

Меѓу присутните имало и лекар кој не бил на должност и тој веднаш ѝ пружил прва помош.

Подоцна, таа била пренесена во болница во блискиот град Ресифе, каде што била лекувана од тешки повреди.

Директорот на болницата Петрус де Андраде Лима изјавил дека по итната операција таа веројатно ќе има потреба од дополнителна трансфузија на крв. Тој нагласил дека пациентката била во тежок хеморагичен шок и постои ризик од инфекција поради угризните рани.

Тој додал дека лекарот кој не бил на должност ѝ го спасил животот со поставување турникет за да го запре крвавењето.

Нејзиниот братучед, Жонас Андре де Лима, кој бил спасувач на должност во моментот на нападот, изјавил дека тој ја извлекол од морето додека таа губела сила и веднаш била однесена подалеку од брегот.

Инцидентот се случил само еден ден откако 11-годишниот Жоао Лукас Кастор Немезио Салес ја изгубил левата нога по напад од ајкула на блиска плажа.

Ајкула уби 13-годишно момче на популарна плажа во Бразил

Момчето било на плажата Пиедаде кога се случил нападот. Момчето изгубило голема количина крв, според лекарите, но е во стабилна состојба.

И Марсела и Жоао биле лекувани во истата болница.

И двете жртви живеат во предградијата на Ресифе, а плажите каде што се случиле нападите имале предупредувачки знаци за опасност од ајкули, иако капењето не е забрането.

Чичкото на момчето раскажал дека го слушнал моментот на нападот додека бил на плажа со децата, по што веднаш влегол во водата за да го спаси.

Тој опишал дека водата била полна со крв и дека момчето го молело да не го остави да умре.

Првичните информации велеле дека ајкулата го каснала за колкот и за раката, но подоцна било потврдено дека левата нога му била ампутирана.

Ајкулата што ја нападнала девојката се претпоставува дека била тигреста ајкула, а за нападот врз момчето се смета дека го извршила бик-ајкула.

Локалните власти соопштиле дека во одредени зони постојат забрани за капење поради ризик од напади од ајкули и дека предупредувањата се јасно истакнати на плажите.

Австралија: Ајкула нападнала дете, се бори за живот