Иранскиот министер за надворешни работи, Абас Арагчи, во саботата за NBC News изјави дека врховниот лидер ајатолахот Али Хамнеи е сè уште жив, колку што тој лично е запознаен со ситуацијата.

-Речиси сите функционери се безбедни и живи. Можеби изгубивме еден или двајца команданти, но тоа не е голем проблем – рече Арагчи, објави Анадолија.

Запрашан за претходно снимените изјави на американскиот претседател Доналд Трамп по нападот, Арагчи ги нарече обидите за промена на режимот „невозможна мисија“.

-Не можете да го промените режимот додека милиони луѓе го поддржуваат таканаречениот режим –  додаде тој, истакнувајќи дека Техеран е секако заинтересиран за деескалација.

САД и Израел започнаа заеднички напад врз Иран рано во саботата, тврдејќи дека целта е да се елиминираат заканите што доаѓаат од иранскиот режим.

Одделни видео пораки објавија израелскиот премиер Бенјамин Нетанјаху и американскиот претседател Доналд Трамп, во кои тие исто така сигнализираа поддршка за напорите за промена на владата во Техеран.

Иран ги опиша нападите како кршење на неговиот суверенитет, вети дека ќе одговори и ќе започне одмазднички напади.

Нападите се случија во време кога беа во тек преговорите меѓу Вашингтон и Техеран за иранската нуклеарна програма, со посредство на Оман. Новата рунда разговори во Женева заврши во четврток.