Ема Хеминг Вилис на посебен начин го одбележа 71. роденден на својот сопруг, актерот Брус Вилис, испраќајќи емотивна порака и истовремено насочувајќи внимание кон нова хуманитарна иницијатива.

Таа на социјалните мрежи објави фотографија од насмеаниот актер, придружена со порака дека денот е посветен на неговото славење. Воедно, ја искористи оваа прилика да ја промовира новооснованата „Фондација Ема и Брус Вилис“, повикувајќи ги обожавателите да донираат или да покажат внимание кон негувателите кои се грижат за лица со фронтотемпорална деменција.

„Ова искуство со фронтотемпоралната деменција ми ги отвори очите за реалноста со која се соочуваат многу семејства. Ме поттикна да ја основам фондацијата со цел да ја подигнам свеста, да поддржам истражувања и да им помогнам на негувателите“, напиша Ема.

Таа додаде дека и мал гест може да има големо значење, апелирајќи до јавноста да ја искористи можноста да му оддаде почит на актерот преку хуманост.

На Брус Вилис му беше дијагностицирана фронтотемпорална деменција во 2022 година, кога имаше 67 години. Со поранешната сопруга Деми Мур има три ќерки – Румер, Скаут и Талула, а со Ема има две – Мејбел и Евелин.

Новата фондација официјално беше лансирана на 12 март, на хуманитарната вечер „Hope Rising“, организирана од Здружението за фронтотемпорална дегенерација. Таа е дел од Фондацијата на индустријата за забава и има за цел подобро разбирање на болеста преку подигнување на свеста, поддршка на научни истражувања и помош за семејствата и негувателите.

„Се надевам дека преку оваа фондација ќе помогнам семејствата да се чувствуваат помалку сами во оваа борба“, изјави Ема, додавајќи дека Брус, како човек со големо срце, би бил горд на оваа иницијатива.