„Темната страна на личноста“ може да влијае врз поврзаноста со домашните миленици, и традиционалните и егзотичните, тврдат некои научници, пишува „Е-клиника“.

Склони сме да кажеме дека со време почнуваме да наликуваме на својот миленик. Но постојат ли некои интригантни психолошки факти што ја поткрепуваат оваа изрека?

Карактеристики на личноста според изборот на миленик

Најголемиот дел од истражувањата за карактерот на сопствениците на домашни миленичиња се фокусирани на разликите меѓу „љубители на кучиња“ и „љубители на мачки“. Сепак, многу малку се знае за тоа како се однесуваат сопствениците на миленици кои имаат изразени т.н. „темни црти на личноста“, како што е нарцизмот. Едно ново истражување го испитувало токму тоа и понудило интересни сознанија.

Истражувачкиот тим, предводен од психологинјата Џенифер Вонк од Универзитетот Оукленд, анализирал како нарцизмот и карактеристиките на граничното нарушување на личноста влијаат врз емоционалната поврзаност на луѓето со домашните миленици – како традиционални (кучиња, мачки, хрчаци), така и егзотични (змии, други влекачи, пајаци, стаорци…).

Очекувањата на истражувачите, предрасудите и претпоставките

Истражувачите претпоставиле дека луѓето со изразен нарцизам би можеле почесто да избираат необични миленици за да привлечат внимание. Но, бидејќи нарцизмот е поврзан со површни односи и недостиг на емпатија, очекувале и помала емоционална врска со животните.

Исто така, предвиделе дека луѓето со црти на гранично нарушување на личноста (импулсивност, нестабилност, анксиозност, непријателство) би можеле да покажат послаба поврзаност со милениците. Врз основа на претходни истражувања, очекувале дека невротичните личности ќе покажат посилна поврзаност со милениците.

Како е спроведено истражувањето?

Во студијата учествувале 325 сопственици на миленици, главно студенти и луѓе регрутирани преку интернет. Од нив, 217 ја оценувале својата поврзаност со традиционални миленици, а 108 учесници ја оценувале емоционалната врска со егзотични видови како гуштери, змии, мајмуни, инсекти и стаорци.

Користени се следниве психолошки скали:

• „Големата петорка“ – стандардизиран тест за личност што мери екстроверзија, отвореност, совесност, невротичност и пријатност.

• Скала на поврзаност со миленици – составена од 64 тврдења преземени од постоечки скали за мерење на емоционална поврзаност со животни.
• Инвентар за патолошки нарцизам – разликува грандиозен нарцизам (манипулативност, чувство на супериорност, очекување на посебен третман) и ранлив нарцизам (несигурност, емоционална нестабилност).

• Скала на карактеристики на гранично нарушување – мери црти како страв од напуштање и емоционална нестабилност.

Егзотични миленици, нарцизам и поврзаноста меѓу нив

Многу од резултатите не се поклопиле со почетните очекувања. Луѓето со изразен нарцизам не поседувале почесто егзотични миленици, ниту покажале помала емоционална поврзаност со нивните животни.

Сепак, подлабоката анализа открила неколку интересни обрасци.

На пример, луѓето со ранлив нарцизам биле посилно поврзани со своите миленици, но само ако имале егзотични видови. Луѓето со грандиозен нарцизам покажале посилна емоционална поврзаност само со традиционални миленици.

Како и во претходни студии, луѓето со висок степен на пријатност и отвореност биле посилно поврзани со миленици. Спротивно на очекувањата, невротичноста не била поврзана со емоционалната врска со животните. Луѓето со црти на гранично нарушување на личноста покажале нешто послаба поврзаност со милениците.

Воопшто земено, учесниците биле повеќе емотивно приврзани кон традиционалните отколку кон егзотичните миленици. Жените биле значително повеќе приврзани кон своите миленици отколку мажите.

Лична перспектива и етички аспекти

Авторот на текстот, психологот Хал Херцог, не бил изненаден што нарцизмот не е поврзан со изборот на егзотични миленици. Тој се сеќава дека во средно училиште чувал змии и гуштери во подрум, не за да ги импресионира другите, туку од искрено воодушевување од нивната необична убавина.

Тој додава дека некои сопственици на егзотични миленици чувствуваат и општествен притисок. Една негова студентка, која чувала стаорци, му открила дека многу љубители на тие животни ги кријат своите афинитети поради негативните реакции на околината.

Сепак, Херцог се запрашал дали е етички оправдано држењето на егзотични животни во заробеништво.

Најдобра заштита од нарциси – бидете досадни како „сива карпа“