Најголемата пречка што треба да се надмине во мировните преговори за ставање крај на руската војна во Украина е територијалната, изјави денеска украинскиот претседател Володимир Зеленски, додавајќи дека американските и украинските претставници разговарале за „некои идеи“ за време на разговорите во Париз, пренесува Ројтерс.

Украина е под притисок од САД брзо да постигне мировен договор што би можел да вклучува болни отстапки, но одби да ги прифати руските барања да отстапи територија што сè уште ја контролира во источниот регион Донбас.

„Најголемото прашање на кое треба да се работи е територијалното. Разговаравме за некои идеи што би можеле да помогнат“, рече Зеленски од Париз, по состанокот со европските сојузници за обликување на безбедносните гаранции за Украина.

„Доколку групите не можат да решат одредени прашања, прашањето може да се упати на раководно ниво“, додаде Зеленски.

Украинската делегација ќе остане во Париз на понатамошни консултации, додаде Зеленски.

Од своја страна, специјалниот претставник на Белата куќа, Стив Виткоф, им изјави на новинарите дека на разговорите во Париз биле разгледани опции за територијалното прашање и дека дискусиите ќе продолжат.

Украина претходно објави дека САД предложиле идеја за слободна економска зона, под услов Киев да се повлече од делови од регионот Донецк кои сè уште се контролирани од украинските сили.

ВИДЕО | Велика Британија и Франција ќе испратат војници во Украина во случај на мировен договор