Седмото издание на големиот целодневен џез-хепенинг со наслов „Денес сѐ е за џезот“ (Today It’s All About Jazz), организиран од Здружението на џез-музичари и слободни уметници – ЗЏМ, ќе се одржи на 30 април, со почеток во 13 часот, во паркот „Ибни Пајко“ во Скопје.

Здружението на џез-музичари и слободни уметници – ЗЏМ Скопје по седми пат ќе го организира централниот настан со кој го одбележува Меѓународниот ден на џезот – 30 април. Првите пет изданија на настанот се одржаа во МКЦ, додека од 2022 година локацијата е во паркот „Ибни Пајко“.

Во изминатите шест години на „Денес сѐ е за џезот“ настапија огромен број џез-имиња, некои од нив мегапопуларни, а некои, пак, таму ги направија првите чекори во џез-музиката. Сите тие помогнаа во славењето на Меѓународниот ден на џезот, славејќи ги „придобивките на џез-музиката како образовна алатка и сила која води кон мир, единство, дијалог и непречена соработка меѓу луѓето“.

Меѓународниот ден на џезот е прогласен во 2011 година од УНЕСКО при Обединетите нации, со цел „да се истакне џезот и неговата дипломатска улога да ги обединува луѓето во сите краишта на светот“.

Денот се слави секоја година на 30 април, а идејата за негово одбележување потекнува од џез-пијанистот и амбасадор на добра волја на УНЕСКО, Херби Хенкок. Со Денот на џезот претседаваат Хенкок и генералниот директор на УНЕСКО.

Програмата на целодневната прослава на Меѓународниот ден на џезот во паркот „Ибни Пајко“ во Скопје ја најавија Марина Туфекчиевска, Гоце Стевковски, Џијан Емин и Кирил Кузманов, членови на ЗЏМ Скопје.

Почетокот е наменет за младите, а композиторот и пијанист Гордан Спасовски ќе одржи џез-работилница за деца и млади. По џез-работилницата следува настап на младински џез-состав во кој членуваат Петар Марков – Маруш (гитара), Давид Ѓоргиев (тапани) и Симеон Будро (бас).

Потоа ќе следуваат концертите на групите Квартет „Акварела“, Никола Бочваров Квартет, Филип Динев Трио – Филип Динев/ Тилман Обербек/ Јан Цајмец, ЗЏМ Биг Бенд со проектот „Запа“, Јуре Пукл Орган трио – Јуре Пукл/ Марко Чрнчец/ Крис Смит, а хепенингот ќе го затворат гостите од Африка – Адедеџи „Јоруба Одисеја“.

– Годинава посебно внимание посветивме на квалитетот на групите што настапуваат на хепенингот. Можеби дел од имињата на изведувачите не звучат познато, но ве уверуваме дека се од светски ранг и имаме навистина сериозен „лајн-ап“ со концерти – истакна Гоце Стевковски.

Триото на Филип Динев настанува во Хамбург и претставува еден од најавтентичните и најактивни музички џез-состави во регионот, а елементи од џез, балканска и класична музика се интегрален дел од композиторскиот печат на Динев.

Квартетот „Акварела“ е група што од неодамна работи во Скопје во состав Јани Костурски – вокал, Павел Ренџов – тапани, Ѓоко Грујовски – гитара и Маја Капсарова – бас.

Квартетот на Никола Бочваров неодамна го промовираше албумот „Гласна тишина“ и истиот ќе биде изведен и на џез-хепенингот. Јуре Пукл Орган трио првпат настапуваат во Скопје и ќе изведат модерен џез.

Адедеџи е нигериски пејач, гитарист, композитор, аранжер и мултиинструменталист. Неговиот бенд е составен од девет луѓе и вклучува некои од најдобрите студиски музичари од Нигерија, најгруви ритам секција, прекрасни машки и женски придружни вокали и неверојатна дувачка секција, која го надополнуваа афро-бит звукот.

Домаќините на настанот, ЗЏМ Биг Бенд оркестарот, кој е единствен од ваков тип во нашата држава, ќе го изведат проектот „Запа – неповторливиот Френк Запа“.

(Текстот е објавен во „Културен печат“ број 176, во печатеното издание на весникот „Слободен печат“ на 29.04.-01.05.2023)