Збирка драми од големиот Шекспир продадена за скоро 10 милиони долари
Комплетна и оригинална книга од првата печатена збирка драми на англискиот писател Вилијам Шекспир постави нов рекорд, се продаде на аукција за нешто помалку од 10 милиони долари.
Збирката се нарекува „First Folio“ објавена во 1623 година, седум години по смртта на Шекспир.
„Комплетната копија на „First Folio“ се појавува еднаш во генерација“, изјави Маргарет Форд, меѓународна раководителка на книги и ракописи во аукциската куќа „Christie“.
Аукциската куќа ја понудила збирката на Шекспир во Њујорк и соопшти дека продажбата поставила нов рекорд на светска аукција кога станува збор за печатено литературно дело.
Колекционерот на ретки изданија, Стефан Ловентхајл го купил примерокот преку телефонска понуда.
Кога првично била печатена, „First Folio“ не само што била првото собрано издание на драми од Шекспир, туку и првпат се отпечатиле 18 од 36 драмски текстови. Меѓу кои трајните ремек-дела на англиската литература како „Macbeth“, „The Tempest“ и „Julius Caesar“.
„Овие 18 драми многу веројатно немаше да преживеат, да не се случело првото печатење на „First Folio“, изјавила Форд.
Маргарет Форд додала дека оваа збирка е целосна заслуга на Џон Хемингс и Хенри Кондел, актери и пријатели на Шекспир.
После неговата смрт, двајцата ги собрале неговите драми, ги препрочитале и утврдиле точност на текстот пред тој да се печати одржувајќи жив спомен на Шекспир.
Познато е дека постојат околу 235 примероци од „First Folio“ и не сите од тие копии биле комплетни. А засега се знае дека само шест целосни копии се во приватна сопственост.
Аукциската куќа проценила дека оваа копија би се продала од 4 до 6 милиони долари. Оваа книга е придружена со писмо напишано пред 200 години од Едмонд Мелоун, проучувач на Шекспир од крајот на 18 век и почетокот на 19 век.
Во писмото, Мелоун му се обраќа на Џон Фулер сопственикот на примерок „First Folio“ во тоа време, велејќи дека го прегледал текстот и со сигурност ја потврдува неговата автентичност.
„Затоа што Шекспир ги надминува националните граници, навистина како никој друг автор, секогаш беше малку изненадувачки што сè уште немаше копија во некои делови на светот“, изјавила Форд.
На пример, сè уште нема оригинални копии од оваа книга во Кина, Русија, Израел, па дури и во Данска – изјавила таа, „а ние го поврзуваме Хамлет, принцот на Данска, со таа земја“.