Во Културно-информативниот центар (КИЦ) во Скопје, во продажниот салон, на 8 ноември ќе биде отворена завршната изложба на дела настанати на работилниците за алтернативна фотографија на фестивалот „Зрно“, кои се одржаа во јули во битолското село Цапари.

– „Зрно“ ја негува фотографијата на автентичен начин, невиден до сега на овие простори, и за само две години се етаблира во светот како единствен настан од ваков вид. Годинава успеа да обедини триесетина фотографи и љубители на фотографијата од цела Европа и да ги донесе во прекрасната природа под Пелистер, во преубав простор каде што редовно се одржува уметничката колонија „Де Ниро“ – истакнуваат организаторите на фестивалот.

Оваа година на „Зрно“ имаше седум работилници на кои се експериментираше, се споделуваше страст, се печеше леб, се споделуваше хемија и љубов и се градеше креативен однос кон фотографијата.

Во периодот од 10 до 16 јули се одржаа: Работилница за мокар колодиум, под водство на Предраг Узелац, Нови Сад; Работилница за креативни игри со полароиди под водство на Мартина Павлоска, Милано, Италија; Работилница за лумен принтови, под водство на Јелена Белиќ, Скопје; Работилница за Морденсаж техника, под водство на Сашо Алушевски, Скопје; Работилница за сендвич принтови, под водство на Стефан Стефановски, Нови Сад; Работилница за класична аналогна фотографија под водство на Ивана Томановиќ, , Нови Сад; и Работилница за цијанотипија, под водство на Дамиан Диаконеску, Темишвар, Романија.

На завршната изложба во КИЦ-Скопје ќе бидат претставени автентични, оригинални, уникатни дела од учесниците на работилниците.

– Некои од фотографските техники никогаш претходно не биле изучувани и/или изложени кај нас, бидејќи „Зрно“ не е обичен фестивал, „Зрно“ е страст, игра, живот! „Зрно“ е единствено доживување! – посочуваат организаторите на фестивалот и на изложбата.