Целосно е завршена евакуацијата на македонските државјани од земјите на Блискиот Исток кои до овој момент се пријавија да се евакуираат од регионот, информира Министерството за надворешни работи и надворешна трговија.

Со последниот, петти лет што вчера слета на Меѓународниот аеродром во Скопје, евакуирани се вкупно 147 патници, од кои 119 македонски државјани и 28 странски државјани.

Со овие летови, вкупниот број евакуирани македонски државјани достигна 605.

„Министерството уште еднаш нагласува дека безбедноста на граѓаните е највисок приоритет, што се потврдува и со фактот дека евакуацијата на сите македонски државјани кои изразија интерес за враќање во земјата е целосно завршена.

Воедно, информираме дека дежурниот СОС телефонски број, како и контактите на дипломатско-конзуларните претставништва, и понатаму остануваат на располагање на македонските граѓани,“ велат од МНР.