Заменик-министерот за надворешни работи на Грција задолжен за економска дипломатија Костас Франкојанис попладнево ќе допатува во Скопје во дводневна работна посета на Северна Македонија и ќе одржи низа средби со министри од економскиот сектор, со заменик- министерката за надворешни работи, со вицепремиерите за економски и за европски прашања, како и со премиерот Димитар Ковачевски, јави дописничката на МИА од Атина.

-На агендата разговори на заменик- министерот со претставници на новоизбраната Влада на Северна Македонија ќе се најдат билатералните економски односи на двете земји и можностите за нивно проширување и зајакнување, соопштија од грчкото МНР во пресрет на посетата.

Според официјалната програма, заменикот шеф на грчката дипломатија попладне ќе се сретне со министерот за финансии на Северна Македонија и ќе ја посети Стопанска банка, каде што ќе има средби со раководството, додека во вечерните часови ќе присуствува на вечера во негова чест организирана од заменик-претседателите на Владата надлежни за економски и за европски прашања Фатмир Битиќи и Бојан Маричиќ.

Франкојанис утре ќе се сретне со заменик- министерката за надворешни работи Фатмире Исаки, со заменик-претседателот на Владата надлежен за европски прашања Бојан Маричиќ, со министерот за економија Крешник Бектеши и со заменик-претседателот на Владата надлежен за економски прашања Фатмир Битиќи, а ќе биде примен и од премиерот Димитар Ковачевски.

Посетата на заменик-министерот за надворешни работи на Грција задолжен за економска дипломатија Костас Франкојанис е прва на грчки владин претставник по изборот на новата Влада кај нас.