Голема полициска операција се одвива во германскиот град Зинциг, каде утрово околу 9 часот дошло до заложничка криза во филијала на Фолксбанк, пишува „Билд“.

На терен се распоредени силни полициски сили, меѓу кои и специјални единици, а над поширокото подрачје кружат хеликоптери.

Според досегашните информации, драмата почнала откако оклопно возило за транспорт на пари застанало пред банката. Кога еден од вработените во компанијата за обезбедување излегол од комбето со намера да влезе во објектот, бил пресретнат од непознат маж кој му се заканил.

Напаѓачот и вработениот, според наводите, сега се наоѓаат во трезорот на банката.

Портпаролот на полицијата потврди дека станува збор за тековна заложничка криза.

„Според моменталните информации, веруваме дека во банката има повеќе криминалци и заложници. Еден од заложниците е возачот на возилото за транспорт на пари“, изјави тој.

Од полицијата соопштија дека состојбата на терен засега е стабилна.

„Во моментов нема опасност за граѓаните надвор од обезбедената зона“, порача германската полиција.

Пред филијалата на Фолксбанк има голем број полицајци, а центарот на градот е целосно ограден. Оклопното комбе и натаму стои паркирано пред влезот во банката.

Жителите преку социјалните мрежи се повикани да го избегнуваат централното градско подрачје. Полицијата апелираше да не се шират лажни и непроверени информации.

❗️🇩🇪 Hostages were taken at a bank in Sinzig, western Germany.

The police have cordoned off the building. Special forces went to the place.#Sinzig #Germany #bank #hostages pic.twitter.com/RIfMcBSA7D

— Slyuda (@theslyuda) May 8, 2026

Засега нема официјална потврда колку луѓе точно се држат како заложници во банката, ниту дали киднаперите се вооружени.

Во меѓувреме, на социјалните мрежи се појавија гласини дека дел од сторителите веќе побегнале, но полицијата досега не ги коментирала тие тврдења.

Зинциг се наоѓа во сојузната покраина Рајнска област-Пфалц, на околу 10 километри од границата со Северна Рајна-Вестфалија. Најблиските поголеми градови се Бон, оддалечен околу 20 километри, и Кобленц, на околу 30 километри.

ВИДЕО| Автомобил се заби во пешаци во Германија, има загинати и тешко повредени