За седум дена во Битола подигнати 200 метри кубни отпад
ЈП „Комуналец” – Битола во соработка со локалните јавни претпријатија и со поддршка на локалното население за седум дена исчисти 200 метри кубни отпад.
На денешната завршна акција организирана по повод неделата на еколошки акции, директорот на ЈП „Комуналец”-Битола Панде Богоевски истакна дека ефикасната реализација е резултат на поголемата вклученост на граѓаните.
– Нашата упорност и работливост вроди со плод, свеста кај граѓаните се подигнува, а потврда за тоа е нивното зголемено учество во овие акции. За само седум дена во Битола подигнати се над 200 метри кубни отпад. Денес чистевме во месноста „Боримечка”, „Буковски ливади”, „Тепсија”, Стар интернат и клучка Ротино, а во акцијата со сите ресурси се и вклучија локалните ЈП „Водовод”, ЈП „Нискоградба”, ЈП „Пазари” и ЈП „Паркинзи”. Исчистени се 20 депонии на исто толку локации, и што е најважно сите локации се исчистени на барање на граѓаните кои заедно со нас чистеја за поубава околина, посочи Богоевски.
ЈП „Комуналец”-Битола искажа јавна благодарност до медиумите кои ја афирмираа еколошката акција, како и до граѓаните. Богоевски посочи дека акцијата за гломазен отпад станува добра навика, граѓаните се јавуваат и од нивните домови се подига гломазниот отпад.