Патријархот на Српската православна црква (СПЦ) Порфириј денеска оцени дека целта на пресудата на Судот на Босна и Херцеговина (БиХ) против претседателот на Република Српска (РС) Милорад Додик е „да се поништи демократски изразената волја на српскиот народ“ и со тоа „да се делегитимира целокупното постоење на РС, народот на Србија и на тој начин на Србија“.

Како што се наведува во соопштението на СПЦ, патријархот денеска го посети Додик во Бања Лука и апелираше до сите власти да преземат одговорност за зачувување на мирот, а до меѓународните воени единици (ЕУФОР) да направат се што е во рамките на нивниот мандат да ги намалат тензиите и антагонизмите и да не претставуваат закана за ниту една од заедниците.

Во соопштението се наведува дека Додик по тој повод изјавил дека раководството на Република Српска е обединето и решено да користи политички и правни средства за да го брани Дејтонскиот устав на Босна и Херцеговина како единствена можна рамка за живот во БиХ.

Тој оцени и дека улогата на црквата е од незаменливо значење за зачувување на идентитетот на српскиот народ на тие простори.