За да се избегнат оштетувања, но и да не страдаат главите на граѓаните: Сообраќајните знаци во Тетово се поставуваат на столбови од 4 метри
Секторот за комунални дејности при Општина Тетово во овој период постави сообраќајни знаци на повисоки столбови на неколку места во градот со цел да не бидат предмет на намерни оштетувања од несовесни граѓани.
– Такви столбови се користени и порано во Тетово. Станува збор за метални столбови за сообраќајни знаци што се високи вкупно четири метри од кои пола метар мора да биде во земја. Постарите модели се 180 сантиметри, па ако на столбот има два сообраќајни знака, честопати се предмет на оштетувања, но и проблем на граѓаните да минат крај нив на тротоар, информираат од Секторот за комунални дејности при Општина Тетово.
Според претставници на секторот, до 30-тина сообраќајни знаци со столбови годишно се евидентираат како оштетени. За менување на оштетените столбови, сообраќајни знаци и семафори во 2020 година е потпишан договор за јавна набавка со фирма од Гостивар во вредност од над еден милион денари, објавен на електронскиот систем за јавни набавки.