Во средното училиште „Владо Тасевски“ во Скопје се воведува нова стручна квалификација – специјалист за мехатроника на камиони и тешки возила, а наставата ќе се реализира во соработка со шведската автомобилска компанија Волво, информираше министерката за образование и наука, Весна Јаневска.

На почетокот, како што вели министерката, квалификацијата ќе се нуди како неформално образование за возрасни, а се очекува следната година да стане дел од системот на формално стручно образование.

„Заедно со шведската министерка за европски прашања, н.е. Џесика Розенкрац и повеќе претставници на Волво, шведската амбасада и на швајцарската развојна организација Хелветас, го посетивме училиштето и остваривме средба со училишното раководство, наставниците и учениците.Среќна сум што Македонија добива нови партнери во заложбите за континуиран развој на стручното образование, кое нема да биде скромно ако кажам дека е силна страна на националниот образовен систем и затоа мора да продолжи постојано да се надградува“, истакна Јаневска вчера.

Таа очекува да има интерес за новата квалификација затоа што според регионално истражување таа е навистина побарувана.