Претседателот на Владата, Христијан Мицкоски во интервју за „360 степени” на МРТ за напролет најави реконструкција на Владата и „освежување“ во институциите.

„По конгресот, по сите преструктурирања во рамките на партијата, напролет очекувам да имаме и освежување во рамките на Владата, прегрупирања, догрупирања, доекипирања, проширувања и во рамките на државните институции, така што ова е тој грантограм кој во следниот период како претседател на Влада и доколку ја добијам довербата на делегатите, како претседател на ВМРО-ДПМНЕ, нè очекува. Формирање на овој тим, кој потоа треба да го понесе и изнесе товарот до следните парламентарни избори“ – рече премиерот.

Во истото интервју, Мицкоски рече дека нема намера да се кандидира за шеф на државата, како и дека претстојниот трет мандат на чело на ВМРО-ДПМНЕ, доколку го освои на конгресот идната недела, ќе му биде и последен, како што налага статутот на партијата.

Мицкоски: ВМРО-ДПМНЕ ми е буквално како трето дете, но третиот мандат ќе ми биде последен