Кошаркарското градско дерби меѓу ПАОК и Арис е одложено, откако во судир на двете навивачки групи бил убиен еден навивач на ПАОК.

Момчето кое починало било на возраст од 20 години, а причина било неконтролирано крварење по убод со нож во пределот на срцето.

Грчките медиуми објавија дека во меѓувреме за инцидентот 23-годишен навивач на Арис сам се пријавил во полиција во придружба на адвокат. Тој тврдел дека бил нападнат од група навивачи на ривалскиот клуб и дека во самоодбрана со нож го избодел помладиот сограѓанин. Сепак, и покрај ваквите наводи, обвинителството против него покренало постапка за убиство со умисла, нелегално поседување оружје и негова употреба.

Адвокатот на семејството на жртвата изјавил дека осомничениот уште од почетокот се обидувал внимателно да ја гради тезата за самоодбрана.

„Во овој момент најдобро што може да направи е да молчи и да покаже почит кон споменот на жртвата“, изјавил тој.

Фаталниот судир се случил пред две вечери во солунската населба Каламарија.

PAOK vs Aris game in the Greek Basketball League postponed after a 20-year-old PAOK supporter was killed in Thessaloniki 😯

The suspect later turned himself in to police and faces serious charges: https://t.co/d0Va0pMrk3 pic.twitter.com/GpHuiax3c9

— BasketNews (@BasketNews_com) March 14, 2026

Според информациите од истрагата, жртвата изгубила повеќе од два литра крв. Обдукцијата покажала дека смртоносниот удар бил директно во срцето.

Советничката на семејството на жртвата и вонредна професорка по судска медицина на Универзитет во Тесалија, Елени Зангелиду, изјавила дека причината за смртта е голема загуба на крв.

„До тоа дошло поради пукање на ѕидот на срцето, предизвикано од остар предмет, како нож. Тоа бил смртоносниот удар. Имало и втор убод под десната пазува, но првиот бил фатален“, објаснила таа.

Дополнително, покрај убодните рани, биле утврдени и сериозни повреди на главата предизвикани од удари со тап предмет, меѓу кои и скршеница на јагодичната коска.