Во САД ќе им се суди на руски и украински хакери, запленети 6 милиони долари

Хакерски напад/ Фото: Архива на Слободен Печат

Американското Министерство за правда поднесе обвинение против украински и руски државјани за хакерски напад врз американска компанија, а САД заплени 6 милиони долари, искористени за уцена.

Јарослав Васински, 22-годишен украински државјанин уапсен во Полска минатиот месец, ќе одговара пред американското правосудство за користење на софтвер за уцена, наречен RЕвил, кој ги чинеше американските компании милиони долари, пишува Си-Ен-Ен.

Бројни уцени

Нападот на Васински „заразил“ 1.500 компании ширум светот, според обвинението поднесено во Тексас.

Меѓу другото, за измама и перење пари е обвинет и 28-годишниот руски државјанин Евгениј Полјанин, менаџер на РЕвил.

Министерството за финансии на САД објави дека дуото добило повеќе од 200 милиони долари во криптовалути Биткоин и Монеро преку уцена. Се додава дека латвиската и естонската влада биле клучни во истрагата.