Стотици луѓе во Киев денеска се простија од познатиот украински балетан Олександр Шаповал, првенец на Националната опера и истакнат уметник, кој пред неколку дена беше убиен во борбите против руската војска во источна Украина. Ден по руската инвазија врз неговата земја, тој доброволно се пријавил во војска за да ја брани.

Некои од луѓето клекнаа на колена, а други ракоплескаа додека војниците го носеа ковчегот со телото на Шаповал, обвиен со украинско знаме во Националната опера во Киев.

Двете ќерки на Шаповал, кои се тинејџерки, беа меѓу луѓето кои му оддаваа почит. 47-годишниот Шаповал бил балетан во Киевската опера од 1994 година. Се пензионирал и почнал да предава танц во 2021 година.

Откако руските трупи се повлекоа од Киев, Шаповал се борел во источниот регион Донбас. Тој бил убиен во руски минофрлачки напад во близина на Мајорск во Донецк, на 12 септември.