Во Специјалниот суд во Хаг денеска се очекува да продолжи судењето за случајот против поранешните водачи на ОВК Хашим Тачи, Кадри Весељи, Јакуп Красниќи и Реџеп Сељими, јавува Косово-онлајн.

Минатата недела во Хаг, на седница затворена за јавноста, заврши сослушувањето на 19-от сведок во случајот против поранешните лидери на ОВК.

Хашим Тачи, Кадри Весељи, Реџеп Сељими и Јакуп Красниќи се обвинети за воени злосторства и злосторства против човештвото.

Првобитното обвинение против четворицата обвинети беше потврдено на 26 октомври 2020 година и оттогаш беше неколкупати изменето.

Во моментов е во сила обвинителниот акт поднесен на 27 февруари 2023 година.

Секој од обвинетите се товари врз основа на индивидуална кривична одговорност по шест точки за злосторства против човештвото: прогон, затвор, други нечовечки дела, тортура, противправно лишување од живот и присилно исчезнување на лице.