Во галеријата „Метаноја“ е поставена изложбата „Таен премин кон Месечината“ на Ване Костуранов
Во галеријата „Метаноја“ во Скопје, во соработка со Балканскиот институт за вера и култура, од 28 ноември е поставена изложбата „Таен премин кон Месечината“ на Ване Костуранов.
Авторот е роден и живее во Струмица. Тој е самоук сликар и илустратор. Неговите дела ги истражуваат двата света во кои тој постои – свесниот и несвесниот, внатрешниот и надворешниот свет. Овие два навидум спротивставени света се судираат во неговите слики и тешко е да се утврди каде едниот почнува, а другиот завршува.
Во однос на најновата изложба со наслов „Таен премин кон Месечината“, рецензентот д-р Коста Милков посочува дека препознатливите куќички на Ване Костуранов сѐ повеќе излегуваат од „осаменоста“ на своето постоење. Заштитниот знак на овој уметник, дводимензионалните ѕидови со прозорчиња и покрив, еволуирал.
„Не се работи толку за перспективата на ’лебдење‘ на платното, колку за посмелата употреба на бои и пејзажна перспектива на куќичките“, објаснува Милков, кој додава и дека „Ване е уметник-мечтател, кој сака да ги преиспитува и да ги предизвикува парадигмите“.
– Конечното уметничко дело е комплетирано преку „техне“ и „логос“ не во смисла на современиот композит „технологија“, туку во смисла на егзистенцијалната феноменологија. Овие два концепта се неизбежно поврзани на нивото на соодносот меѓу уметничкото (τέχνη) и словесното (λόγος ). Процесот на креативната концептуализација со бои и четка и мисловната концептуализација со зборови и перо овозможуваат артикулација на она што генерички се именува како духовно. Притоа „техне“ ја претставува естетската рефлексивност, а „логос“ ја изразува контемплативната поетичност. Куќичките, дрвјата, патеките, Сонцето и Месечината на Костуранов се уметничка поезија – истакнува рецензентот д-р Коста Милков.
Изложбата „Таен премин кон Месечината“ на Ване Костуранов во галеријата „Метаноја“ ќе трае до крајот на јануари 2024 година.
(Текстот е објавен во „Културен печат“ број 207, во печатеното издание на весникот „Слободен печат“ на 2-3.12.2023)