Градоначалникот на Општина Бутел денеска соопшти дека потпишал договор за изградба на нова поликлиника, која треба да се гради на местото на старата амбуланта.

Притоа, тој освен што соопшти дека изградбата ќе започне наскоро,  „заборави“ да каже со кого е потпишан договорот, колку ќе чини изградбата и до кога треба бутелчани да ја добијат новата поликлиника, но не заборави да му се заблагодари на премиерот Христијан Мицкоски и да спомене дека исполнува изборно ветување.

И официјалното соопштение што стигна до медиумите не се разликува од информацијата на градоначалникот.

Ве известуваме дека денес (23 март 2026 год.) градоначалникот Дарко Костовски го потпиша договорот за изградба на нова поликлиника. Предизборното ветување на градоначалникот се исполнува. Изградбата на новата поликлиника претставува историски чекор за општина Бутел. Градоначалникот изрази огромна благодарност на премиерот Христијан Мицкоски, за посветеноста и поддршката на Владата за реализација на капиталниот проект кој граѓаните го очекуваат со децении. Новата поликлиника ќе биде изградена на местото на старата амбуланта и ќе обезбеди полесен и побрз пристап до здравствени услуги за сите граѓани. Во новиот објект ќе биде достапен пункт за итна медицинска помош, ноќна служба, РТГ кабинет со ехо, лабараторија и аптека, соопштија од Општина Бутел.