Странските државјани од Косово, Италија и Турција го сочинуваат најголемиот процент странци во Албанија кои во земјата престојуваат со дозвола, објави Институтот за статистика (ИНСТАТ), пренесуваат локалните медиуми.

„На крајот на минатата година, бројот на странци со дозволи за престој во Албанија изнесува 21.940, што е зголемување од 2,2% во споредба со претходната година. Од нив, речиси 12 илјади се поради работа. Во 61,9% од странците со дозволи за престој доминираат мажи, во споредба со жени со 38,1%. Најзастапената возрасна група е онаа од 30 до 39 години“, наведува ИНСТАТ.

Во 2024 година, бројот на странци со потекло од Косово изнесувал 4.592 жители, што претставува зголемување од 23,7% во споредба со 2023 година, додека оние со потекло од Италија се 3.763 лица, што е раст од 11,5% во споредба со 2023 година. Значително зголемување бележат и лицата од азиските земји и тоа 20,1% (4.545 лица), како и од Америка и Африка од 23,4% (3.028 лица).

Вработувањето е главната причина и тоа кај 54,3% од дозволите за престој, по што следуваат, семејно обединување 24,5%, други причини 16,3%, студии 4% и хуманитарни цели 0,9%.