Со доаѓањето на потоплото време, сè повеќе луѓе поминуваат време во природа, но тоа носи и зголемен ризик од убод од крлеж, пишува „Дневно“.

Познато е дека крлежите можат да бидат носители на бактеријата борелија, причинител на лајмска болест, како и на вирусот на крлежно пренослив енцефалитис. Затоа е исклучително важно крлежот навреме да се забележи и правилно да се отстрани од кожата.

Докторката Џенин Боуринг сподели едноставен трик за отстранување на крлеж. Таа советува околу местото каде што е закачен крлежот да се нанесе масло од нане со стапче за уши. Мирисот на нане им пречи на крлежите, поради што тие се одвојуваат од кожата, по што може лесно да се отстранат.

Сепак, стручњаците нагласуваат дека најсигурен начин за отстранување е со пинцета, без стискање или вртење, за да се избегне истекување на потенцијално заразен материјал.

Крлежите се мали паразити кои се хранат со крв и се најактивни од пролет до есен. Нивниот убод често поминува незабележано, но може да доведе до сериозни здравствени последици.

Лајмската болест е една од најчестите инфекции што ги пренесуваат. Првиот симптом најчесто е црвенило кое се шири околу местото на убодот, но доколку не се лекува навреме, може да ги зафати зглобовите, срцето и нервниот систем.

Дополнително, крлежите можат да пренесат и крлежно пренослив менингоенцефалитис – вирусна инфекција која ги зафаќа мозокот и мозочните обвивки. За оваа болест постои вакцина, која се препорачува за лица што често престојуваат во природа.

Ризикот од инфекција расте колку подолго крлежот останува закачен на кожата, па затоа е важно по секој престој во природа внимателно да се прегледа телото.

Крлежите претставуваат опасност и за домашните миленици, особено кучињата и мачките. Затоа, редовната заштита со соодветни препарати и прегледи е клучна и за нив.

Информираноста, внимателноста и навремената реакција се најдобрата заштита од крлежите и болестите што ги пренесуваат.