Владата даде зелено светло за буџетот за 2024 година: Ќе има за трошење 5,5 милијарди евра
Во Буџетот ќе има пари за зголемени плати, пензии, социјална помош и за сервисирање на обврските кон кредиторите – дециден е премиерот Ковачевски
Владата го усвои Предлогот на буџетот за 2024 година. Приходите се планирани на 5,040 милијарди евра што е за 10 проценти повеќе од годинешниов буџет, а расходите се планирани на ниво од 5,5 милијарди евра или 5,7 проценти повеќе од она што го имаме за трошење оваа година.
Буџетот е планиран на претпоставен економски раст од 3,4 проценти во 2024 година.
– Буџетот ќе биде столб на економското заздравување, а потоа и на економски раст. Растот на БДП од 3,4 проценти се темели пред сè на растот на бруто-инвестициите поддржани од државата, на мерките за економски раст, а двигател ќе биде и приватниот сектор, како и најавените инвестиции во технолошко-индустриските развојни зони. Пристапниот процес кон ЕУ дополнително ќе ги поттикне странските инвеститори – рече премиерот Димитар Ковачевски на претставувањето на буџетот за наредната година.
Премиерот најави забрзана реализација на инфраструктурните проекти, привлекување странски компании, поддршка на домашни компании и реформски пат кон ЕУ.
– Во Буџетот ќе има пари за зголемени плати, пензии, социјална помош и за сервисирање на обврските кон кредиторите – дециден е премиерот.
Премиерот најави дека капиталните расходи ќе бидат 733 милиони евра и дека „буџетот има изразена развојна компонента“, при што се планира инвестициски циклус за да економијата застане на здрави нозе.
Во насока на понатамошна фискална консолидација, Ковачевски рече дека е предвидено намалување на буџетскиот дефицит за 150 милиони евра, така што буџетската дупка за наредната година е планирана на 545 милиони евра, или 3,4 проценти од БДП.
Министерот за финансии Фатмир Бесими рече дека во денешно време со низа кризи и предизвици е многу тешко да се прават предвидувања и најави дека до крајот на годинава ќе има уште една прераспределба на пари во Буџетот за 2023 година.
– Ценовната криза и геостратешките турбуленции не останаа без импликации на глобалните текови, а ја погодија и нашата економија која е мала и многу отворена. ММФ и Светска банка ги дели само една улица, често се консултираат, а имаат различни проекции и ги менуваат проекциите. Многу е тешко да се предвидува – рече Бесими.
На новинарско прашање, тој рече дека за двата изборни циклуси – претседателски и парламентарно – се предвидени 1 милијарда денари (околу 16 милиони евра).
– Колку што побара ДИК, толку одобривме – рече Бесими.
Тој оцени дека, вака како што е скроен Буџетот за 2024 година, тој е развоен, одржлив и дава солидна основа за економска перспектива на стопанството и на граѓаните.