Високи нивоа на олово се пронајдени во многу протеински прашоци во Соединетите Американски Држави, според студија спроведена од „Конзумер рипортс“ , непрофитна организација за потрошувачи посветена на независно тестирање на производи.

„Конзумер рипортс“, кој ја објави студијата во вторникот, соопшти дека просечното ниво на олово пронајдено во овие производи е зголемено во споредба со претходните години.

Поточно, од 23-те тестирани протеински прашоци, повеќе од половина содржеле повеќе олово (0,5 микрограми) по порција отколку што едно лице може безбедно да консумира во еден ден.

Два од тестираните производи содржеле толку високи нивоа на олово што „Конзумер рипортс“ им советувало на потрошувачите воопшто да не ги користат.

„Не препорачуваме дневна употреба на повеќето протеински прашоци бидејќи многу од нив содржат високи нивоа на тешки метали, а ниту еден не е неопходен за да ги исполните вашите протеински цели “, рече Туде Акинлеге, главен истражувачки директор во „Конзумер рипортс“.

Во последниве години, и во САД и во Европа, побарувачката за храна и додатоци во исхраната богата со протеини е нагло зголемена, делумно затоа што протеините го зголемуваат чувството на ситост и помагаат да се спречи прејадувањето , но главно затоа што многу луѓе сакаат да изградат мускулна маса .

Сепак, некои здравствени експерти предупредуваат дека Американците веројатно консумираат премногу протеини, или барем не треба да внесуваат дополнителни протеини од додатоци во исхраната, пијалоци или преработена храна збогатени со протеини.