Пазарот со криптовалути во Македонија е полурегулиран и во моментов претставува идеално место за измами и т.н. Понзи шеми, вели адвокатот Душко Гошевски, експерт за тргување со криптовалути и блокчеин технологии.

– Ние сме „Мека“ за Понзи шеми, затоа што вие сега реално немате финансиска писменост и едукација во овој дел, бидејќи нема ниту една македонска платформа, ниту еден македонски провајдер, каде што може луѓето да се информираат. И на вас кога ќе ви стигне на мејл, следите, пратите дека во светот оди нагоре пазарот и кога ќе ви стигне мејл со можност за брза соработка, тргувај овде, тргувај онде, тоа се можности за големи Понзи шеми – изјави Гошевски во утринската програма на Слободен печат.

Голем број на држави во светот овој пазар го имаат регулирано и на тој начин привлекле сериозни инвестиции.

– Даноците во Македонија се мали и тоа може да привлече инвеститори. Не е исто да платите 53 отсто данок на приход во скандинавските земји и 10 отсто во Македонија. Сепак, нерегулираниот пазар ги одвлекува сериозните инвеститори, бидејќи тоа може да им донесе легален проблем во иднина. – додава тој.

Во интервјуто Гошевски се осврна и на почетоците н Биткоинот, првата, највредната и воедно најпопуларна криптовалута во светот, а објасни и што точно означува терминот „копање“ на коини.

– Копањето всушност е верификација на тргувањето на блокчеин платформата. Блокчеин е технологијата, а криптовалутите се трансакциите кои се валоризираат на различни начини со префрлање од едно на друго место – вели Гошевски.

Тој апелира на ниската информираност и свест во Македонија, кога се во прашање криптовалутите. Потсетува дека и во нашиот образовен систем овој сегмент од економија та не е опфатен, со што нашите идни претприемачи и експерти ќе бидат неподготвени за натпревар на глобалниот пазар.

Целото интервју со нашиот гостин погледнете го во видеото: